Կառավարությունն առաջարկում է ստեղծել Հակակոռուպցիոն և Վերաքննիչ հակակոռուպցիոն դատարաններ: ԱԺ պետաիրավական հարցերի մշտական հանձնաժողովը հավանություն տվեց «Հայաստանի դատական օրենսգիրք» սահմանադրական օրենքում փոփոխությունների նախագծին:
Հիմնական զեկուցող, արդարադատության նախարար Ռուստամ Բադասյանը նշեց, որ դատարանների ստեղծմամբ կապահովվի կոռուպցիոն բնույթի գործերով մասնագիտացված քննություն՝ նպաստելով կոռուպցիայի դեմ պայքարի արդյունավետության բարձրացմանը:
Նախարարը մանրամասնեց՝ ապօրինի ծագում ունեցող գույքի բռնագանձման գործընթացում ևս մասնագիտացվածությունն ապահովելու համար առաջարկվում է ստեղծել մասնագիտացված հակակոռուպցիոն դատարան՝ 25 դատավորով:
Իսկ Վերաքննիչ հակակոռուպցիոն դատարանն, ըստ Բադասյանի, կունենա 10 դատավոր:
Առաջարկվող փոփոխությունների համաձայն՝ Վճռաբեկ դատարանում քրեական պալատը գործելու է 8 դատավորով, իսկ քաղաքացիական և վարչական պալատը՝ 13 դատավորով:
Բադասյանն ասաց, որ նախագծով նախատեսվում են Հակակոռուպցիոն և Վերաքննիչ հակակոռուպցիոն դատարանների դատավորների նշանակման խիստ սահմանափակումներ: Դատավոր չի կարող նշանակվել վերջին 5 տարում կարգապահական պատասխանատվության ենթարկված անձը:
Հարցին՝ Արգիշտի Քյարամյանը կարող է հավակնել Հակակոռուպցիոն դատարանի նախագահի պաշտոնին, Բադասյանն ասաց, որ տեսականորեն այո, նա համապատասխանում է սահմանված չափորոշիչներին, սակայն լինելու է մրցութային հանձնաժողով, որն էլ կընտրի դատարանի նախագահին: «Պարոն Քյարամյանի հետ կապված հարցն անպայման շահարկման առարկա կդառնա, բայց սա անլուրջ խոսակցություն է, քանի որ դատարանի նախագահն ընտրվելու է մրցույթով»,- նշեց նախարարը:
