Խորհրդարանն առաջին ընթերցմամբ քննարկեց ԱԺ «Իմ քայլը» խմբակցության պատգամավոր Սիսակ Գաբրիելյանի ներկայացրած «Պետական տուրքի մասին» օրենքում փոփոխությունների նախագիծը:
Հեղինակը մանրամասնեց՝ նախագիծը վերաբերում է պատերազմի ընթացքում և դրա ավարտից հետո քաղաքացիների՝ հայրենիքին տրամադրած տարաբնույթ օգնությունը մաքսավճարներից և հարկային վճարներից ազատելուն:
«Բացառություն է մեկ վճարը: Խոսքը պետական պարտադիր տուրքի մասին է, ըստ որի՝ սահմանվում է, որ տվյալ դեպքում յուրաքանչյուր տոննայի համար 1000 դրամ կվճարվի, մյուս բոլոր վճարներն այս արտոնությամբ վերացվում են:
Սա նաև հնարավորություն կտա, որ ժամ առաջ այդ օգնությունը տեղ հասնի, և ՀՀ կառավարության համապատախան մարմինները ժամ առաջ կբաշխեն օգնությունը դրա կարիքն ունեցող քաղաքացիներին: Որովհետև այս դեպքում, քանի դեռ չկա վճարումը, ցավոք սրտի, այդ ապրանքները մինչև գանձապետական հաշվեհամարին վճարումը հավաստող փաստաթուղթը, չեն կարող բաց թողնվել մաքսային պահեստներից»,- նշեց պատգամավորը:
