ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցում անդրադարձել է նոյեմբերի 9-ի եռակողմ հայտարարության դրույթին, որը նախատեսում է տրանսպորտային ուղիների ապաշրջափակում:
Պետրոս Ղազարյան - Պարո՛ն վարչապետ, քանի որ Սյունիքից ենք խոսում, հայտարարության մեջ կար մի այսպիսի կետ կամ կետի ինչ-որ շարունակություն, որ Սյունիքով պետք է ինչ-որ միջոց տրամադրել Նախիջևան-Ադրբեջան, կա՞ այստեղ հստակեցում, թե՞ չէ:
Նիկոլ Փաշինյան - Ես էլի ուզում եմ բոլորիս ուշադրությունը հրավիրել այն նրբության վրա, որ հայտարարության մեջ ո՛չ Սյունիք, ո՛չ Մեղրի, ո՛չ միջանցք արտահայտություն գոյություն չունի: Եվ կա տրանսպորտային ուղիների դեբլոկադայի մասին պնդում:
Պետրոս Ղազարյան - Այստեղ կա՞ կարմիր գիծ, որ այ սա չի լինի երբեք:
Նիկոլ Փաշինյան - Կարմիր գիծը մեր տարածքային ամբողջականությունն է: Բայց ես ուրիշ բան եմ ձեզ ուզում ասել, հիմա այսօր, երեկ, օրինակ՝ Վերին Լարսն ամբողջությամբ փակ է բոլոր տեսակի բեռնատարների համար, և սա ծանոթ պատմություն է: Հիմա, օրինակ, եթե պարզվի, որ մենք կարող ենք երկաթուղային հաղորդակցություն ունենալ Ռուսաստանի հետ, եթե պարզվի՝ երկաթուղային հաղորդակցություն ունենալ Իրանի հետ, եթե պարզվի՝ Նախիջևանով և՛ Իրանի հետ, և՛ Նախիջևանի հետ, դա մեզ համար լա՞վ նորություն կլինի, թե՞ վատ:
Պետրոս Ղազարյան - Դա կենսական նորություն կլինի:
Նիկոլ Փաշինյան – Հիմա, եթե օրինակ՝ մենք Նախիջևանով գնալու ենք Իրան, եթե ստացվի և Նախիջևանով գնալու ենք, մեր բեռները երկաթուղով տեղափոխվելու են Ռուսաստան, մենք ո՞նց ենք պատկերացնում, մենք պետք է ասենք՝ Նախիջևանի և Ադրբեջանի տարածքով պետք է գնանք Ռուսաստան, բայց Ադրբեջանը մեր տարածքով չպե՞տք է գնա Նախիջևան, դա հնարավո՞ր է:
Պետրոս Ղազարյան - Հարց կա, եթե այդ «եթե»-ները լինեն և երկրորդ՝ այդ ճանապարհների նկատմամբ վերահսկողությունը։
Նիկոլ Փաշինյան - Այո՛, և դա հետագա քննարկման առարկա է: Եվ այստեղ բազմաթիվ հարցեր կան, որոնք պետք է լուծվեն, դրանք պարզ հարցեր չեն: Եթե դրանք պարզ հարցեր լինեին, 30 տարվա, 25 տարվա ընթացքում կլուծվեին:
