Երկօրյա պայքարից հետո Երևանի «Դինամո» մարզադահլիճում պարզ դարձան հունահռոմեական ոճի ըմբշամարտի Հայաստանի չեմպիոնները:
Ըստ քաշային կարգերի՝ ոսկե մեդալակիրներ դարձան Ռուդիկ Մկրտչյանը, Արմեն Մելիքյանը, Հրաչյա Պողոսյանը, Կարեն Ասլանյանը, Սահակ Հովհաննիսյանը, Վարուժան Գրիգորյանը, Արտավազդ Վարդանյանը, Վիգեն Նազարյանը, Արթուր Շահինյանը և Ռազմիկ Քուրդյանը:
10 քաշային կարգերում Հայաստանի առաջնությանը մասնակցում էր 78 ըմբիշ, գոյություն ունեցող 6 օլիմպիական քաշային կարգերից 5-ում մասնակցությունն այնքան քիչ էր, որ այն անցկացվեց շրջանաձև մրցակարգով:
67 կգ քաշային կարգում վստահ տեսք ուներ 2019 թվականի Եվրոպայի առաջնության բրոնզե մեդալակիր Կարեն Ասլանյանը:
Այս առաջնությունում հատկապես ուրախալի էր երիտասարդ ըմբիշների ոսկե մասնակցությունը: 87 կգ քաշային կարգում հաղթողի կոչմանն արժանացավ 17-ամյա Վիգեն Նազարյանը, իսկ 19-ամյա Սահակ Հովհաննիսյանը երկրորդ տարին անընդմեջ ոսկե մեդալ է նվաճում տարբեր քաշային կարգերում:
Օլիմպիական տարին ըմբիշները կսկսեն ավանդական ծաղկաձորյան հավաքով, որից հետո կնախապատրաստվեն միջազգային և օլիմպիական վարկանշային մրցաշարերին:
