Վերջին երկու տարվա ընթացքում Իսրայելում տեղի կունենան չորրորդ խորհրդարանական ընտրությունները: Երեկ Կնեսետը լուծարվեց երկրի պետական բյուջեի հաստատման ժամկետի ավարտի պատճառով: Գործող օրենսդրության համաձայն՝ արտահերթ ընտրությունները տեղի կունենան մարտի 23-ին՝ տեղեկացնում է Euronews-ը:
Բենիամին Նեթանյահուն մնում է վարչապետ՝ մինչ կհաստատվի նոր կառավարություն, որը կձևավորվի քվեարկությունից հետո: Իսրայելի ներկա կառավարությունը սկսեց գործել մայիսին՝ ավելի քան 500 օր տևած քաղաքական ճգնաժամից հետո: Գլխավոր մրցակիցներն էին իշխող «Լիկուդ» կուսակցությունը՝ Նեթանյահուի գլխավորությամբ, և Քահոլ-Լավանը՝ գլխավոր շտաբի նախկին պետ Բենի Գանցի գլխավորությամբ, որոնք կոալիցիա կազմեցին ռոտացիոն սկզբունքով: Գանցը պետք է վարչապետի պարտականությունները ստանձներ 2021 թվականի նոյեմբերից:
Ըստ վերլուծաբանների՝ Գանցը կորցրել է ընտրողների աջակցությունը, և , ամենայն հավանականությամբ, նրա կուսակցությունը կլուծարվի մինչև ընտրությունների օրը: