Լեռնային Ղարաբաղում ողջ մնալու հավանականությունը մեկ տոկոս էր. մահն ամենուր էր. սիրիացի վարձկան

Թուրքիան ու Ադրբեջանը հերքում են Լեռնային Ղարաբաղի հակամարտության գոտում տեղի ունեցած վերջին ռազմական գործողություններում սիրիացի վարձկանների օգտագործումը: Չորս վարձկանները BBC-ին հայտնել էին, որ իրենց վարձել էին Ադրբեջանում անցակետում ծառայելու համար, սակայն նրանք անսպասելիորեն հայտնվել են առաջնագծում:

Լավ վճարվող աշխատանքի մասին լուրերը Սիրիայի հյուսիսային շրջաններում սկսեցին շրջանառվել դեռևս այս տարվա օգոստոսից:

Սիրիացի վարձկաններից մեկը բրիտանական պարբերականին պատմել է, որ Ադրբեջանում զինվորական անցակետում լավ աշխատանքի մասին ինքը տեղեկացել է ընկերոջից:

Նրանց հայտնել են, որ իրենք պետք է ստանձնեն Ադրբեջանի սահմանին խաղաղապահի առաքելությունը՝ առաջարկելով ամսական 2 հազար դոլար, ինչը մեծ երջանկություն էր նրանց համար:

Սիրիացի վարձկանները թուրքամետ Սիրիայի ազգային բանակի զինյալներն են, որոնք կռվում են Սիրիայի կառավարական ուժերի դեմ:

Վարձկաններից մեկի հավաստմամբ՝ արաբական երկրում շատերն օրական 1 դոլար են վաստակում, և նման բարձր աշխատավարձը նրանց համար Աստծո պարգև էր: Թուրքիայով թուրքական ռազմատրանսպորտային օդանավով Ադրբեջան տեղափոխված սիրիացի վարձկանների թիվը հաշվվում էր 1500-2000:

Վարձկանները պատմում են, որ աշխատանքն իրենց պատկերացածը չէր, նրանցից շատերը զինվորական գործի փորձառություն չունեին և պետք է մասնակցեին պատերազմին: Այդ մասին հասկացան, երբ իրենց տեղափոխել են առաջնագիծ ու հրամայել կռվել:

«Ես հույս չունեի, որ ողջ կմնամ: Ողջ մնալու հավանականությունը մեկ տոկոս էր: Մահն ամենուր էր»,-պատմել է սիրիացի վարձկանը:

Դիտումների քանակ1931