ՀՀ ոստիկանության հասարակայնության հետ կապի և լրատվության վարչությունից 1lurer.am-ի հետ զրույցում հաղորդել էին՝ այսօր առավոտյան ահազանգ են ստացել, որ Երևանում՝ Դավթյան փողոցի 1/4 շենքի բակում, մեքենա է այրվում: Դեպքի վայր է մեկնել օպերատիվ-քննչական խումբ:
ՔԿ տեղեկատվության և հասարակայնության հետ կապերի բաժնի պետ Ռիմա Եգանյանը 1lurer.am-ին մանրամասներ հայտնեցին, որ հարուցվել է քրեական գործ՝ «Հայէկոնոմբանկ» ԲԲԸ-ի գործադիր տնօրենի նկատմամբ սպանության փորձ կատարելու դեպքի առթիվ:
Քննչական կոմիտեից հայտնեցին, որ 2020 թ. դեկտեմբերի 8-ի ժամը 19:00-ից մինչև դեկտեմբերի 9-ի ժամը 08:45-ն ընկած ժամանակահատվածում, առերևույթ հանցագործություն կատարած անձը, շատերի կյանքի համար վտանգավոր եղանակով «Հայէկոնոմբանկ» ԲԲԸ-ի գործադիր տնօրենին ապօրինաբար կյանքից զրկելու դիտավորությամբ, վերջինիս պատկանող՝ Երևան քաղաքի Վ.Դավթյան փողոցի շենքերից մեկի բակում կայանված «LEXUS LX 570» մակնիշի ավտոմեքենայի տակ պայթուցիկ սարք է ամրացրել, որը 2020 թ. դեկտեմբերի 9-ին՝ ժամը 08:45-ի սահմաններում, վարորդի կողմից վարելու ընթացքում պայթել է: Սակայն հանցագործությունն ավարտին չի հասցվել, քանի որ վերոնշյալ ԲԲԸ-ի գործադիր տնօրենը ավտոմեքենայում չի գտնվել:
Կատարվում են քննչական և դատավարական գործողություններ:
Նախաքննությունը շարունակվում է։
