2021-ին Հայաստանում տնտեսական աճը կանխատեսվում է 3.2 տոկոս: Այդ մասին խորհրդարանում հաջորդ տարվա բյուջեի նախագծի քննարկմանն ասաց ֆինանսների նախարար Ատոմ Ջանջուղազյանը:
«Կան ռիսկեր, որոնք պետք է օգտագործվեն ի նպաստ, և ոչ թե թույլ տանք, որ դրանք տեղի ունենան: Նշված 3.2 տոկոսը դժվար սպասվող տնտեսական արդյունք է և քրտնաջան աշխատանք է պահանջում»,- նշեց նախարարը:
Ջանջուղազյանի խոսքով՝ 2021-ը հարկաբյուջետային քաղաքականության տեսակետից բացառիկ տարի է լինելու, քանի որ, ըստ նրա, հայտնի չէ՝ երբ է վերականգնվելու տնտեսությունը: Նա ասաց, որ հաջորդ տարի կունենանք 5.3 տոկոս ՀՆԱ-ի պակասուրդ, այս տարի դեֆիցիտը կգերազանցի 7 տոկոսը:
Նախարարը տեղեկացրեց, որ 2021-ի բյուջեի ծախսերը նախատեսվում են 1 տրլիոն 850 մլրդ դրամ:
