Արցախի տեղեկատվական կենտրոնի հաղորդմամբ՝ հանրապետության քննչական կոմիտեն վարույթ է ընդունել Հադրութում 5 անձանց սպանության ու գույքի կամայական ոչնչացման դեպքի առթիվ հարուցված քրեական գործ:
Ադրբեջանի Հանրապետության զինված ստորաբաժանումները 2020 թ. հոկտեմբերի 10-ին՝ օրվա առաջին կեսին, խախտելով 09.10.2020 թ. ՌԴ Մոսկվա քաղաքում ձեռք բերված 10.10.2020 թ. ժամը 12:00-ից հումանիտար զինադադարի վերաբերյալ պայմանները և 1949 թ. օգոստոսի 12-ի «Պատերազմի ժամանակ քաղաքացիական բնակչության պաշտպանության մասին» Ժնևյան կոնվենցիայի պահանջներն ու միջազգային մարդասիրական իրավունքի մյուս նորմերը, ներխուժելով Արցախի Հանրապետության Հադրութ քաղաք, ազգային ատելության շարժառիթով, ապօրինաբար, դիտավորությամբ, հրազենի գործադրմամբ կյանքից զրկել են ռազմական գործողություններին անմիջականորեն չմասնակցող 5 քաղաքացիական անձանց, ինչպես նաև ռազմական անհրաժեշտությամբ չպայմանավորված՝ հրկիզել են քաղաքացիական անձանց տներ և այլ շինություններ՝ այդ եղանակով անօրինական, կամայական ոչնչացնելով մեծ չափերի գույք:
Դեպքի առթիվ ԱՀ քննչական կոմիտեում վարույթ է ընդունվել քրեական գործ՝ նախատեսված՝ ԱՀ քրեական օրենսգրքի 416-րդ հոդվածի 1-ին մասի 1-ին կետով, 416-րդ հոդվածի 2-րդ մասի 6-րդ կետով:
Նախաքննությունը շարունակվում է:
