Արտակարգ իրավիճակների նախարարությունը և «Չին-հայկական հարաբերությունների տարածաշրջանային զարգացման հիմնադրամ» ԲԲԸ-ն փոխըմբռնման հուշագիր են ստորագրել՝ ի դեմս նախարարության գլխավոր քարտուղար Վահագն Օհանյանի և հիմնադրամի գլխավոր տնօրեն Վլադիմիր Սիմոնյանցի:
Համաձայն հուշագրի դրույթների՝ «Չին-հայկական հարաբերությունների տարածաշրջանային զարգացման հիմնադրամ» ԲԲԸ-ն աջակցելու է Արտակարգ իրավիճակների նախարարության և Չինաստանի Ժողովրդական Հանրապետության գործընկեր կառույցների և հիմնարկների միջև գործակցության հաստատմանը, ինչպես նաև նախարարությանն անհատույց օգնություն տրամադրելու տարբերակներ է փնտրելու:
Արտակարգ իրավիճակների նախարարության գլխավոր քարտուղար Վահագն Օհանյանը, բարձր գնահատելով նմանօրինակ նախաձեռնությունները, շնորհակալություն է հայտնել համագործակցության առաջարկի համար:
«Հարկ է նշել, որ «Չին-հայկական հարաբերությունների տարածաշրջանային զարգացման հիմնադրամ» ԲԲԸ-ի և Արտակարգ իրավիճակների նախարարության միջև կնքվող փոխըմբռնման հուշագրի դրույթների իրականացումը մեծապես կնպաստի Արտակարգ իրավիճակների նախարարության տեխնիկական հագեցվածության ապահովման, ինչպես նաև մեր երկրում արտակարգ իրավիճակների պատրաստվածության, աղետների կանխարգելման և կարողությունների զարգացման գործընթացին: Հուշագրի ստորագրումը ևս մեկ առիթ է ավելի ամրապնդելու և խորացնելու հայ-չինական դարավոր բարեկամական հարաբերությունները», - ասել է նախարարության գլխավոր քարտուղարը:
Հանդիպման վերջում կողմերը հուշանվերներ են փոխանակել:
