Շոտլանդացի հանրահայտ դերասան Շոն Քոներին ճանաչվել է 007 գործակալ Ջեյմս Բոնդի դերակատարներից լավագույնը պատմության մեջ: «Լավագույն Բոնդ» տիտղոսին նա արժանացել է RadioTimes-ի անցկացրած քվեարկության արդյունքներով, որին մասնակցել է մոտ 14 հազար մարդ:
Քվեարկության առաջին փուլում Շոն Քոներին հավաքել է ձայների 56 տոկոսն ու առաջ անցել 43 տոկոս ձայներ հավաքած Դենիել Քրեյգից: Երկրորդ փուլում առաջատարը եղել է Փիրս Բրոսնանը՝ 76 տոկոս ձայնով, որին հաջորդում է 24 տոկոս ձայներ հավաքած Ջորջ Լեզենբին: Երրորդ փուլի արդյունքներն անակնկալ էին: 41 տոկոս ձայներ հավաքած Ռոջեր Մուրը պարտվել է Թիմոթի Դալթոնին, որի օգտին քվեարկել էր ընտրողների 49 տոկոսը:
Այսպիսով՝ եզրափակիչում Քոներին մրցել է Դալթոնի և Բրոսնանի հետ: Շոտլանդացի դերասանը հավաքել է ձայների 44 տոկոսը: Երկրորդ տեղում է Դալթոնը՝ 32, երրորդը՝ Բրոսնանը՝ 23 տոկոս ձայներով:
Շոն Քոներին Ջեյմս Բոնդ խաղացել է վեց անգամ:
