Ժանգոտ ճոպաններով ամենառիսկային վերելակները Երևանում փոխարինվում են նորերով: Բյուջեի տնտեսումների հաշվին, բնակիչներից գումար չգանձելով, այդ աշխատանքն անելու քաղաքապետի հունվարյան հայտարարությունից ու պիլոտ-ծրագրից հետո վարպետները վերջապես գործի են անցել:
Մասնագետները հին սարքերն իրենց շարժիչներով, խցիկով ամբողջությամբ հորաններից դուրս են բերում, նորը մոնտաժում՝ այս պահին 124 հասցեում: Բոլոր շենքերում վերելակները կանգնած կմնան մոտ մեկ ամիս: Ի՞նչ փուլում են աշխատաքնները՝ տեսնելու է գնացել քաղաքապետ Մարությանը, պատվերը կատարող «ՌաֆէլԳրիգ» ընկերության ղեկավարից ճշտել նորույթի տեխնիկական բոլոր մանրամասները:
Վերելակները բելառուսական «Մագիլով լիֆտ-մաշինն» են, հոսանքի խնայողական ծախսով: Սենսորային են, հարմարեցված ոչ միայն տեսողության խնդիր ունեցողների, այլև հաշմանդամության սայլակով տեղաշարժվողների համար: Գույքը շենքի բնակիչներին է հանձնվում անվճար, բայց պայմանով, որ սկսեն միջոցներ հավաքել՝ 25 տարի անց այն սեփական ուժերով փոխելու համար: Պահանջվող մեծ գումարների պատճառով խնդիրը մայրաքաղաքում այնքան էր սրվել, որ ստացել էր «Մահվան վերելակներ» անունը:
Հայկ Մարության, Երևանի քաղաքապետ - Վերջին 28 տարվա մեջ ամբողջությամբ փոխվել է 35 վերելակ: Այս պահին մենք արդեն փոխում ենք 500 վերելակ...
Աշխատանքը կատարող ընկերությունը երկու տարվա երաշխիք է տալիս: Բնակիչները հույս ունեն՝ արագ կմոռանան հին վերելակների իրենց պատմությունը չի կրկնվի...
Ըստ քաղաքապետարանի տվյալների՝ առաջիկա տարիներին Երևանում պետք է փոխարինվի առնվազն 3000 վերելակ: Առաջին 500-ի նորացումը կավարտվի մինչև տարեվերջ:
