Ստրասբուրգյան դատարանի որոշումից 4 օր անց էլ Ֆինանսների նախկին նախարար Գագիկ Խաչատրյանը դեռ Վարդաշեն քերակատարողականում է։ Նրա պաշտպանն ասում է՝ թեև ՄԻԵԴ-ը Հայաստանի կառավարությունից պահաջնել է Խաչատրյանին անհապաղ ապահովել համարժեք բուժմամբ՝ նաև քաղաքացիական հիվանդանոցում, պատասխանատու կառույցները չեն շտապում կատարել եվրադատարանի հանձնարարականը։
64-ամյա Խաչատրյանը, ով արդեն 11 ամիս կալանքի տակ է, ողնաշարի ստենոզի անհապաղ վիրահատության կարիք ունի՝ ընդգծում է պաշտպանն ու պնդում, որ դրա ձգձգումը կարող է վտանգել նրա առողջությունը։ Երեմ Սարգսյանի խոսքով՝ իրենք միջնորդնել էին նախկին նախարարի բուժումը Գերմանիայում կազմակերպելու համար, բայց այս հարցով դատարանը որոշել է՝ անհրաժեշտության դեպքում բժիշկները պետք է հրավիրվեն դրսից։ Սակայն, պաշտպանը վստահ է, եթե անգամ համբուրգցի մասնագետները Հայաստան գան, վիրահատության համար անհրաժեշտ գործիքակազմը այստեղ չի լինի։
Օտարերկրյա մասնագետներին հրավիրելու ծախսը դրված է Խաչատրյանի վրա, քաղաքացիական հիվանդանոցում բուժում ստանալն էլ ըստ անհրաժեշտության է գնահատվելու՝ եվրադատարանի որոշումից մեջբերում է անում ՄԻԵԴ-ում Հայաստանի ներկայացուցիչը։ Եղիշե Կիրակոսյանը տեղեկացնում է՝ քայլեր արդեն ձեռնարկվում են, 15 օրյա ժամկետում էլ կառավարությունը պետք է պատասխանի, թե ինչ է արել, դատարանի պահանջը ինչպես է կատարվել։
Պաշտոնեական դիրքի չարաշահման և առանձնապես խոշոր չափով վատնում կատարելու համար մեղադրվող Գագիկ Խաչատրյանի պաշտպանը մինչդեռ պնդում է՝ քերակատարողականում իր պաշտպանյալը չի ստանում անհրաժեշտ բուժօգնությունը, Սարգսյանը կարծում է նաև՝ նպատակ կա նրան քաղաքացիական հիվանդանոց չտեղափոխելու։
Այնինչ արդարադատության նախարարությունից հակադարձում են՝ նախկին նախարարը «Քրեակատարողական բժշկության կենտրոնի» ստորաբաժանման մշտական հսկողության ներքո է, ստանում է նշանակված դեղորայքային բուժումները։ Գերատեսչությունից նաև հայտնում են՝ Խաչատրյանին առաջարկվել է դինամիկ հսկողության և բուժման նպատակով տեղափոխվել Դատապարտյալների հիվանդանոց, սակայն նա հրաժարվել է, հրաժարվել է նաև համապատասխան որակավորում ունեցող ֆիզիոթերապևտի ծառայությունից։
