Առողջապահության նախարարության մամուլի խոսնակ Ալինա Նիկողոսյանը մանրամասներ է հայտնել Չինարիի բնակիչ, հակառակորդի ԱԹՍ-ի կողմից վիրավորում ստացած 48-ամյա Արամայիս Հովակիմյանի առողջական վիճակի մասին:
«Ինչպես ավելի վաղ հայտնել էր պաշտպանության նախարարությունը` հակառակորդի հարվածից վիրավորվել է Չինարի գյուղի 48-ամյա բնակիչ Արամայիս Հովակիմյանը: Պացիենտի մոտ առկա են մարմնի մակերեսի մոտ 10% այրվածք, բազմաբեկոր վնասվածք ազդրոսկրի հատվածում: Վերջինիս վիճակը բժիշկները նախնական գնահատում են կայուն ծանր: Հետագա վիճակի վերաբերյալ կտրվի լրացուցիչ տեղեկատվություն:
Տեղեկացնեմ նաև, որ ամեն ինչ արվում է տարածաշրջանում բուժօգնությունը պատշաճ կազմակերպելու համար. հիվանդանոցներն իրավիճակով պայմանավորված համալրվել են բժշկական կադրերով ու անհրաժեշտ պարագաներով»,- տեղեկացրել է առողջապահության նախարարի խոսնակը:
