ԱԺ «Իմ քայլը» խմբակցության պատգամավոր, Մարդու իրավունքների պաշտպանության և հանրային հարցերի մշտական հանձնաժողովի անդամ Մարիա Կարապետյանն անդրադարձել է ԲՀԿ նախագահ Գագիկ Ծառուկյանին առնչվող քրեական գործերին:
«Բարգավաճ Հայաստան» կուսակցությունը, իհարկե, շատ կցանկանար, որ այս ամենը լիներ քաղաքական հետապնդում։
Նախ՝ դա շատ կօգներ արդեն իսկ ավանդական դարձած պաշտպանական մարտավարությունից օգտվելու համար։ Սակայն դա նաև հրաշալի կլիներ էլ ավելի հին ավանդույթներ ունեցող «քաղաքական ձեռնարկատիրության» համար։
Այսպես, սկզբում նրանք փորձեցին մեզ վրա թանկով վաճառել «Կառավարության հրաժարականի պահանջը», հետո գինը մի քիչ իջավ, դարձավ՝ «մենք ընդամենը քննադատություն ենք հնչեցրել», իսկ երեկ հասանք նվազագույն գնի՝ «մենք ընդամենը մեր մտահոգություններն ենք հայտնել»։
Որքան մեծ է գործում քննվող՝ պետությանը հասցված վնասը, այնքան ամպագոռգոռ է աճուրդի հանված «քաղաքական հայտարարությունը»։
Որքան մեծ են խաղատները, այնքան բուռն են ազգային արժեքների մասին հայտարարությունները։
Աճուրդը չկայացավ, քանի որ քրեական գործը չէր վաճառվում»,- գրել է Կարապետյանը Ֆեյսբուքի էջում։
