Այսօր մեկնարկել է Խաչատրյանի անվան 16-րդ միջազգային մրցույթի երկրորդ փուլը, տեղեկացնում են «Արամ Խաչատրյան-մրցույթ» հիմնադրամից։ Մրցույթի ժյուրիի նախագահ‚ ՀՀ ժողովրդական արտիստ Էդուարդ Թադևոսյանը‚ խոսելով մասնակիցների կատարողական վարպետության մասին‚ նշում է‚ որ ընդհանուր մակարդակը բավականին բարձր է։ «Նրանց թվում կան նաև վիրտուոզ կատարողներ‚ շատ չեն‚ բայց կան‚- ասում է պարոն Թադևոսյանն ու նկատում‚ որ առցանց մրցույթը նորություն է մրցույթների պատմության մեջ։- Իրական ու առցանց հարթակներում մասնակիցների հետ շփումների տարբերություն կա. մի բան է‚ երբ քո առջև ելույթ է ունենում երաժիշտը‚ տեսնում ես նրա կենդանի աչքերը‚ մեկ այլ բան է‚ երբ տեսնում ես միայնակ կանգնած‚ սենյակում առանձնացած երաժշտի»։
Խաչատրյանական մրցույթը կայանում է կորոնավիրուսային հիվանդությամբ պայմանավորված սահմանափակումների պայմաններում‚ և տեխնոլոգիաներն օգնեցին‚ որպեսզի‚ չնայած ստեղծված իրավիճակին‚ ամենամյա երաժշտական այս ստուգատեսը կայանա։ Պարոն Թադևոսյանն ընդգծում է‚ որ շատ մեծ աշխատանք է կատարվել կազմակերպիչների կողմից. «Ես երբեք չէի պատկերացնի‚ որ դա կարող է հնարավոր լինել»։
Էդուարդ Թադևոսյանը նկատում է‚ որ ժյուրիի անդամների գնահատականները հիմնականում համընկնում են‚ մասնավորապես‚ առաջին փուլում 90 տոկոսով ժյուրիի անդամների կարծիքները նույնն էին։
Ժողովրդական արտիստը հաջողություն է մաղթում մրցելույթները շարունակող մասնակիցներին. «Ցանկանում եմ‚ որ չհիասթափվեն ու չվհատվեն նրանք‚ ովքեր չհաղթահարեցին առաջին փուլը կամ գուցե հետագայում դուրս կմնան պայքարից։ Մրցույթը լավ բան է. բացահայտում է տաղանդավոր երաժիշտներին‚ սակայն կյանքը հաճախ ցույց է տալիս‚ որ նրանք‚ ովքեր չեն կարողանում մրցույթի շրջանակներում հաջողության հասնել‚ իրենց նվագով‚ արվեստի նկատմամբ ինքնատիպ վերաբերմունքով հետագայում կարողանում են շահել ժողովրդի համակրանքը։ Լինում են դեպքեր‚ երբ հրաշալի երաժիշտը չի կարողանում հավաքվել և լավագույնս ներկայանալ»։
Մասնակիցների ելույթներին կարելի է հետևել առցանց՝ հետևյալ հղմամբ https://khachaturian-competition.com/։
Խաչատրյանի անվան միջազգային մրցույթը Միջազգային երաժշտական մրցույթների համաշխարհային ֆեդերացիայի (World Federation of International Music Competitions) անդամ է‚ մրցույթի կազմակերպիչն է «Արամ Խաչատրյան-մրցույթ» մշակութային հիմնադրամը։ ՀՀ կրթության‚ գիտության‚ մշակույթի և սպորտի նախարարության աջակցությամբ իրականացվող Խաչատրյանի անվան միջազգային մրցույթը նպատակ ունի բացահայտել տաղանդաշատ երիտասարդ երաժիշտների, նրանց ընձեռել մասնագիտական առաջընթացի հնարավորություններ‚ ինչպես նաև մրցույթի միջոցով է՜լ ավելի հանրայնացնել Արամ Խաչատրյանի արվեստը։
