Տեղի է ունեցել Օմբուդսմանների եվրասիական դաշինքի նիստը տեսակապի միջոցով:
Հայաստանի, Ռուսաստանի, Իրանի, Ղազախստանի, Ղրղզստանի, Սերբիայի և մի շարք այլ երկրների մարդու իրավունքների ազգային հաստատությունների ներկայացուցիչների հետ քննարկվել է կորոնավիրուսի (Covid-19) պայմաններում մարդու իրավունքների վիճակը: Նիստը նվիրված է եղել նաև Հայրենական Մեծ պատերազմի վետերանների իրավունքներին:
Արման Թաթոյանն իր ելույթում ողջունել է Օմբուդսմանների եվրասիական դաշինքի նիստը՝ համարելով այն արդյունավետ համագործակցության լավագույն օրինակ, որը կարևոր հարթակ է մարդու իրավունքների պաշտպանության, այդ հարցում փոխանակման տեսանկյունից:
Նիստի առաջին մասում Պաշտպանը նշել է, որ Հայրենական Մեծ պատերազմի մասնակիցներից յուրաքանչյուրի իրավունքների պաշտպանությունն իր անմիջական ուշադրության ներքո է. սոցիալական երաշխիքներ, մասնավորապես՝ կենսաթոշակի վճարումները, բժշկական օգնության և սպասարկման վերաբերյալ հարցեր և այլն: Այս բոլոր հարցերը տեղ են գտնում նաև Մարդու իրավունքների պաշտպանի տարեկան հաղորդումներում և արտահերթ զեկույցներում:
Նիստի ընթացքում Արման Թաթոյանն անդրադարձել է նաև նոր կորոնավիրուսի (COVID-19) համաճարակի հիմքով արտակարգ դրության ընթացքում Մարդու իրավունքների պաշտպանի գործունեության առանձնահատկություններին, իրավունքների պաշտպանության հարցում մարտահրավերներին:
Պաշտպանը նշել է, որ աշխատանքը կազմակերպվում է 24-ժամյա արտակարգ ռեժիմով: Դրանից բացի, անդրադարձել է արագ արձագանք պահանջող անհատական դիմումների և թեժ գծին ստացվող զանգերի աննախադեպ աճին, որոնք հիմնականում վերաբերում են արտակարգ դրության ընթացքում ազատ տեղաշարժման սահամանափակումներին, աշխատանքային իրավունքներին, պետական սահմանների փակ լինելու հետևանքով ընտանիքների վերամիավորմանը և այլն:
Մարդու իրավունքների պաշտպանը ընդգծել է արտակարգ դրության պայմաններում քաղաքացիների իրազեկման բարձրացման աշխատանքների կարևորությունը: Անդրադարձել է Պաշտպանի հրապարակած «Նոր կորոնավիրուսի և արտակարգ դրության պայմաններում մարդու իրավունքների վերաբերյալ» ուղեցույցին, որը տպագրվել է բրայլյան գրով, թարգմանվել է անգլերեն և ռուսերեն, ինչպես նաև մեր երկրում բնակվող ազգային փոքրամասնությունների լեզուներով՝ քրդերեն, եզդիերեն, ասորերեն, հնդկերեն: Հատուկ ուղեցույց է հրապարակվել նաև երեխաների համար:
Մարդու իրավունքների պաշտպանը առանձնահատուկ շնորհակալություն է հայտնել Ռուսաստանի Դաշնության Մարդու իրավունքների հանձնակատար Տատյանա Մոսկոլկովային, Բաշկիրիայում և Սվերդլովսկի մարզում Մարդու իրավունքների հանձնակատարներին, ինչպես նաև Ղրղզստանի օմբուդսմանին՝ արտակարգ դրության պայմաններում պետությունների սահմանները փակ լինելու պատճառով ընտանիքների վերամիավորմանն աջակցելու հարցում:
Նիստին մասնակից մարդու իրավունքների ազգային հաստատությունների ներկայացուցիչները կարևորել են արտակարգ դրության պայմաններում մարդու իրավունքների պաշտպանության տեսանկյունից գործընկեր կառույցների միջև արդյունավետ համագործակցությունը:
