Հանրապետության նախագահ Արմեն Սարգսյանը պատասխան նամակ է հղել Կանադայի գեներալ-նահանգապետ Ժուլի Պայետին՝ շնորհակալություն հայտնելով կորոնավիրուսի համավարակի հետևանքով ստեղծված իրավիճակում նախագահին և հայ ժողովրդին ուղղված քաջալերանքի խոսքերի համար:
«Սա միգուցե ամենաբարդ ժամանակաշրջանն է, որում հայտնվել է աշխարհը վերջին տասնամյակների ընթացքում և որն իր ազդեցությունն է թողնում համաշխարհային հանրության վրա։ Կարծում եմ, համընդհանուր քայլեր պետք է ձեռնարկվեն՝ համավարակի հետևանքով տնտեսական վնասների մեղմման և իրավիճակի վերականգնման համար։ Արդյունքների հնարավոր կլինի հասնել միայն համագործակցության և համատեղ ջանքերի ներդրման միջոցով։ Հետևաբար, այս իրավիճակում ուժերի միավորումը, փորձի փոխանակումը և փոխօգնությունն շատ կարևոր են»,- մասնավորապես նշել է նախագահ Սարգսյանը։
Նա նաև իր ցավակցությունն է հայտնել գեներալ-նահանգապետ Ժուլի Պայետին և Կանադայի բարեկամ ժողովրդին՝ օրեր առաջ Նովա Սքոշիա նահանգում տեղի ունեցած ողբերգական միջադեպի կապակցությամբ։
