Լևոն Արոնյանը չի մասնակցի աշխարհի գործող չեմպիոն, նորվեգացի Մագնուս Կարլսենի կազմակերպված արագ շախմատի օնլայն մրցաշարին: Հաղորդվում էր, որ Կարլսենը, որպես մրցաշարի գլխավոր կազմակերպիչ, կցանկանար տեսնել ՖԻԴԵ-ի միջազգային վարկանիշի առաջին 8 շախմատիստներին, սակայն բոլորը չէ, որ պատրաստ են խաղալ: Աշխարհի 8 լավագույն շախմատիստներից մրցաշարին չեն մասնակցի Ալեքսանդր Գրիշչուկը (Ռուսաստան, 6-րդ հորիզոնական), Լևոն Արոնյանը (7-րդ հորիզոնական) և Ուեսլի Սոն (ԱՄՆ, 8-րդ հորիզոնական):
Ապրիլի 18-ին մեկնարկելիք մրցաշարին, բացի Կարլսենից, կմասնակցեն Յան Նեպոմնյաշչին (Ռուսաստան), Ֆաբիանո Կարուանան, Հիկարու Նակամուրան (երկուսն էլ՝ ԱՄՆ), Դին Լիժենը (Չինաստան), Մաքսիմ Վաշյե-Լագրավը (Ֆրանսիա), Անիշ Գիրին (Նիդերլանդներ) և իրանցի Ալիրեզա Ֆիրուջան:
250 հազար դոլար մրցանակային ֆոնդով մրցաշարը կմեկնարկի ապրիլի 18-ին՝ շրջանային համակարգով, և կտևի ավելի քան 2 շաբաթ: Սկզբում բոլոր մասնակիցները կխաղան իրար հետ, իսկ հետո առաջատարները կխաղան փլեյ օֆֆում: Magnus Carlsen Invitational մրցաշարի հաղթողը 70 հազար դոլար կստանա:
