ԱՄՆ նախագահ Դոնալդ Թրամփը տեսակապի միջոցով անցկացված կոնֆերանսի ժամանակ հարյուրավոր հոգեբույժների, հոգեբանների և հասարակական գործիչների հետ քննարկել է այն հարցը, թե ինչպես է կորոնավիրուսի համաճարակը ազդում ամերիկացիների հոգեկան առողջության վրա, հայտնում է Սպիտակ տունը:
«Նախագահը խոստովանել է, որ մեծ թվով ամերիկացիներ են կորոնավիրուսի պատճառով բախվում դժվարությունների, այդ թվում միայնությանը՝ սոցիալական հեռավորության, հուսահատությանը՝ աշխատանքի բացակայության պատճառով: Նրանք անհանգստացած են ու վշտացած հարազատներին կորցնելու համար»,- հայտնել է Սպիտակ տունը:
Կոնֆերանսին մասնակցել են առաջին տիկին Մելանյա Թրամփը և ԱՄՆ փոխնախագահ Մայք Փենսը կնոջ՝ Կարենի հետ:
Սպիտակ տունը հիշեցրել է, որ ամերիկյան տնտեսության աջակցության համար նախատեսված ավելի քան 2 տրիլիոն դոլարից 400 միլիոնը հատկացվել է հոգեբանական և հոգեբուժական ծառայություններին:
