Վրաստանի և Հայաստանի քաղաքացիները կարող են ID (նույնականացման) քարտերով ազատ ելք ու մուտք ունենալ։ Դա հնարավոր կլինի, երբ երկու երկրների կառավարությունները վերջնական համաձայնության գան քաղաքացիների տեղաշարժման հարցում: Առայժմ երկու պետությունների ղեկավարները ստորագրել են «Հայաստանի Հանրապետության կառավարության և Վրաստանի կառավարության միջև քաղաքացիների տեղաշարժի դյուրացման մասին» մտադրությունների հուշագիրը, տեղեկացնում է aliq.ge լրատվական կայքը: Մինչև այժմ Վրաստանը ID (նույնականացման) քարտերով ելք ու մուտք ուներ Թուրքիայի և Ուկրաինայի հետ։
