Առողջապահության համաշխարհային կազմակերպության տվյալների համաձայն՝ աշխարհում շարունակվում է կարմրուկի առումով անբարենպաստ համաճարակային իրավիճակը:
Վերջին տասներկու ամիսների ընթացքում կարմրուկի առավել շատ դեպքեր գրանցվել են Մադագասկարում (213287 դեպք), Ուկրաինայում (57282 դեպք), Ֆիլիպիններում (47722 դեպք), Նիգերիայում (28260 դեպք), Բրազիլիայում (19326 դեպք) և Ղազախստանում (13326 դեպք): Հիվանդացության բարձր ցուցանիշ է գրանցվել նաև Վրաստանում, Հյուսիսային Մակեդոնիայում, Նոր Զելանդիայում, Ղրղըզստանում և այլուր:
Հիվանդությունների վերահսկման և կանխարգելման ազգային կենտրոնը հայտնում է, որ Հայաստանում կարմրուկի առումով իրավիճակը կայուն է։ 2007-ից սկսած՝ Հայաստանում չեն գրանցվում կարմրուկի տեղական դեպքեր։ 2019-ին հանրապետությունում գրանցվել է կարմրուկի լաբորատոր հաստատված բերովի 7 դեպք, որոնք համաճարակաբանորեն կապված էին Ուկրաինայի, Վրաստանի և Ռուսաստանի հետ:
Կարմրուկի կանխարգելման միակ անվտանգ և արդյունավետ միջոցը պատվաստումն է: Միայն ժամանակին և լիարժեք (առնվազն 2 դեղաչափ) իրականացված պատվաստումները կարող են կանխել կարմրուկը և դրա հետևանքով առաջացած բարդությունները:
