Գերմանական Süddeutsche Zeitung հայտնի օրաթերթը 2020 թ․ Մյունխենի անվտանգության համաժողովի վերաբերյալ իր վերլուծական հոդվածի համար որպես առանցք ընտրել է Հայաստանի նախագահ Արմեն Սարգսյանի՝ քվանտային քաղաքականության մասին բանախոսությունը: «Անվտանգության համաժողովը ցույց տվեց, որ դասական տրամաբանությամբ հնարավոր չէ աշխարհում կատարվողը մեկնաբանել, բարեբախտաբար կա Հայաստանի նախագահ Սարգսյանը, որը ֆիզիկոս է»,- գրում է Süddeutsche Zeitung-ի հոդվածագիրը:
Շտեֆան Կորնելիուսը դրականորեն ընդգծում է այն փաստը, որ մյունխենյան համաժողովի շրջանակներում, ի թիվս մնացյալ քաղաքական գործիչների ելույթների, որոնք խոսում էին անվտանգության քաղաքականության խնդիրներից, ներկայիս աշխարհի անվտանգության ճարտարապետության տարբեր խութերից, Արմեն Սարգսյանը յուրահատուկ մոտեցումով մեկնաբանություններ է տվել այդ թեմայի շուրջ:
Հոդվածագիրը նշում է, որ հարցին անդրադարձել է նաև Ֆրանսիայի նախագահ Մակրոնն իր լայնածավալ ելույթում՝ հատուկ շեշտադրելով, որ եվրոպական անվտանգությունը ներկայում այդքան էլ կայուն և վստահելի չէ։ Վերլուծաբանի խոսքով՝ այս ամենի ֆոնին հետաքրքրական էր Հայաստանի Հանրապետության նախագահի խոսքը՝ կառուցված քվանտային քաղաքականության վրա։ Ելույթում հաշվի էին առնված նրա՝ ֆիզիկոսի փորձառությունը և գիտելիքները։
«Նա հանդես եկավ այնպիսի ոճով, որ ցանկանում է կարգուկանոն մտցնել աշխարհում և այդ ուղղությամբ նախատեսում է համապատասխան գործիքակազմ ունենալ»:
Արմեն Սարգսյանի մոտեցմամբ՝ ինչպես քվանտային ֆիզիկան է փոխարինել դասական մեխանիկային, այնպես էլ քվանտային քաղաքականությունը պետք է փոխարինի դասական քաղաքականությանը: Նշելով, որ դասական տրամաբանությամբ այլևս անհնար է մեկնաբանել երևույթները՝ Հայաստանի նախագահն ասել է, որ Հայաստանում 2018 թ. տեղի ունեցած հեղափոխությունը ևս պետք է հասկանալ այս համատեքստում, երբ էներգիայով լիցքավորված տարրերի համադրումը հանգեցրեց միջուկային մեծ ռեակցիայի, որն անվանվեց հեղափոխություն:
