Լիբիայի բնակչության մեկ քառորդը տառապում է երկրում տարիներ շարունակ չդադարող ռազմական հակամարտությունից ու դրա հետևանքներից: Սա Կարմիր խաչի միջազգային կազմակերպության վերջին թարմ տվյալներն են: Կազմակերպության տեղեկության համաձայն՝ շտապ բուժօգնության կարիք ունի ավելի քան կես միլիոն բնակիչ: Արդեն մի քանի տարի է՝ ինչ երկրում երկիշխանություն է: Լիբիայի Բենգազի քաղաքի փողոցներ են դուրս եկել բազմաթիվ քաղաքացիներ, որոնք պահանջում են դադարեցնել երկրում շարունակվող պատերազմը: Բողոքի ակցիաներն անցկացվում են այն հրապարակում, որտեղ էլ 2011-ին հայտարարվել էր Լիբիայի նախկին վարչակարգի տապալման ու հեղափոխության հաղթանակի մասին:
