ԱՄՆ նախագահական մրցավազքը սկսվել է, և նախագահ Դոնալդ Թրամփը, որը, ամենայն հավանականությամբ, կլինի Հանրապետական կուսակցության միակ թեկնածուն, անկաշկանդ վիրավորում է իր դեմոկրատ մրցակիցներին: Թրամփի թիրախում է հայտնվել միլիարդատեր գործարար Մայքլ Բլումբերգը, որին նախագահը կոչել է Mini-Mike Bloomberg: Թրամփի բնորոշմամբ՝ Բլումբերգը «163 սանտիմետր հասակով անկյանք զանգված է, փող ունի, բայց չունի քաղաքական հմտություններ, չի կարողանում բանավիճել պրոֆեսիոնալ քաղաքական գործիչների հետ»: Ի դեպ, Բլումբերգի հասակը 173 սանտիմետր է, Թրամփինը՝ 190:
Թվիթերում դեմոկրատ թեկնածուի պատասխանը երկար սպասել չի տվել: «Դոնալդ Թրամփ, Նյու Յորքում մենք ունենք բազմաթիվ ընդհանուր ընկերներ, որոնք ծիծաղում են քեզ վրա՝ քեզ կոչելով տոնավաճառի խենթ ծաղրածու: Բոլորը գիտեն, որ դու ժառանգել ես մի ամբողջ կարողություն, բայց հիմար գործարքների ու ոչ կոմպետենտության պատճառով դրանք մսխել ես»,- գրել է միլիարդատեր ձեռնարկատերը:
