Վրաստանի չորրորդ նախագահ Գիորգի Մարգվելաշվիլին, որն այդ պաշտոնը զբաղեցնում էր 2013-2018 թվականներին, մեկ տարվա ընդմիջումից հետո հայտարարել է ակտիվ քաղաքականություն վերադառնալու մասին:
Ժամանակին Մարգվելաշվիլին ընտրություններում հաղթեց իշխող կուսակցության՝ «Վրացական երազանք - ժողովրդավարական Վրաստանի» աջակցությամբ, բայց ակտիվ քաղաքականությունից հեռացավ՝ որպես գործող իշխանությունների հետ բաց առճակատման գնացած նախագահ:
Պաշտոնը թողնելուց հետո նա ապրում էր Դուշեթի գյուղում սեփական ձեռքերով կառուցած իր տանը, այգեգործությամբ էր զբաղվում և նույնիսկ դրա մի մասը վարձակալությամբ տուրիստներին էր հանձնում:
«Ես հավատում եմ, որ ժողովրդավարությունը պետք է փրկել, և սա պատճառներից մեկն է իմ վերադարձի: Երկրորդը` Վրաստանում ձևավորվել է քաղաքական ընդդիմության կլոր սեղան, և այն պետք է ուժեղացվի: Կարող եմ ասել նաև, որ այդ սեղանի շուրջ ինձ համար անհայտ մարդիկ են հավաքված, որոնց հետ երբեք քաղաքական դաշինքի չեմ գնացել, բայց հիմա պետք է ձգտել վերկուսակցական նպատակի»,- Sputnik.ge-ի փոխանցմամբ՝ լրագրողների հետ հանդիպման ընթացքում ասել է Մարգվելաշվիլին:
