Տեղի է ունեցել Տրանսպորտի և առևտրի խթանման ռազմավարության մշակման մեկնարկին նվիրված առաջին աշխատաժողովը։ Ռազմավարությունը մշակվում է Ասիական զարգացման բանկի (ԱԶԲ) աջակցությամբ՝ ՀՀ տարածքային կառավարման և ենթակառուցվածքների նախարարության կողմից։
Տրանսպորտի և առևտրի խթանման ռազմավարության հիմնական նպատակն է նպաստել Հայաստանում ճանապարհային ենթակառուցվածքների զարգացմանը, տրանսպորտային ծառայությունների որակի և ճանապարհային անվտանգության մակարդակի, փոխադրումների արդյունավետության բարձրացմանը։ Ռազմավարությունն ուղղված է նաև կայուն, անվտանգ տրանսպորտային և առևտրային ցանցերի ստեղծմանը:
Աշխատաժողովին մասնակցում էին պետական տարբեր գերատեսչությունների‚ Ասիական զարգացման բանկի‚ հասարակական կազմակերպությունների‚ մասնավոր հատվածի՝ ճանապարհաշինական‚ բեռնափոխադրումներ իրականացնող ընկերությունների և այլ կառույցների ներկայացուցիչներ։
Աշխատաժողովի սկզբում ԱԶԲ մասնագետները ներկայացրել են ՀՀ տրանսպորտային ուղիներին նվիրված մանրակրկիտ վերլուծություններ։ Հանգամանորեն քննարկվել են ռազմավարության հիմնական նպատակները‚ սկզբունքները, ուղղությունները։ Անդրադարձ է կատարվել հետագա անելիքներին, ռազմավարության շրջանակներում իրականացվելիք գործողություններին։ Տեղի է ունեցել մտքերի փոխանակում. տարբեր ոլորտների մասնագետներն արել են առաջարկներ‚ ներկայացրել են այն դրույթները‚ որոնք անհրաժեշտ է ներառել մշակվող փաստաթղթի մեջ։
Կազմակերպիչների կողմից հատկապես ընդգծվել է‚ որ ռազմավարության հիմքում դրվելու է հիմնական մի նպատակ՝ ունենալ զարգացած‚ բարձրակարգ և անվտանգ ճանապարհային ցանց։ Առանձնացվել է նաև արագընթաց ճանապարհներ ունենալու կարևորությունը‚ ինչը թույլ կտա խթանել առևտուրը‚ ավելի հասանելի դարձնել շուկաները‚ հեշտացնել կապը հարևան երկրների հետ։ Այս համատեքստում նշվել է‚ որ հիմնանորոգվում է Մ6‚ Վանաձոր-Ալավերդի-Վրաստանի սահման միջպետական ճանապարհը‚ կառուցվում/վերակառուցվում է Հյուսիս-հարավ ճանապարհային միջանցքը։
Խոսելով ճանապարհային անվտանգության մասին՝ շեշտվել է‚ որ այն պատկերացումը‚ թե ճանապարհային անվտանգությունը պայմանավորված է միայն ճանապարհների վիճակով կամ համապատասխան անվտանգության տարրերի ապահովմամբ‚ լիարժեք չէ։ Կան նաև այլ հանգամանքներ‚ որոնք ազդում են ճանապարհային անվտանգության խնդիրներին՝ մեքենաների սարքին լինելը‚ բեռնատարների պատշաճ լուսավորումը‚ քաղաքային‚ բանուկ հատվածներում ճանապարհային լուսավորությունը‚ վարորդների‚ երթևեկության մասնակիցների ինքնագիտակցության‚ կրթության հարցերը. այս ամենի համալիր լուծման դեպքում հնարավոր է էապես բարելավել ճանապարհային անվտանգությունը։
Քննարկման ընթացքում հատուկ շեշտվել է այն‚ որ Տրանսպորտի և առևտրի խթանման ռազմավարությունը պետք է մշակվի՝ համադրելով այն այլ ոլորտների զարգացման ռազմավարությունների հետ։
Նշվել է‚ որ Տրանսպորտի և առևտրի խթանման ռազմավարության մշակմանը նվիրված մեկնարկային աշխատաժողովից հետո կպատրաստվի նախնական զեկույց‚ տեղի կունենան նաև առանձին հանդիպումներ ՀՀ կառավարության ներկայացուցիչների հետ։
Կազմակերպիչները փաստել է‚ որ հանդիպումների‚ քննարկումների այս ձևաչափը լինելու է շարունակական։ Պարբերաբար կազմակերպվելու են նման աշխատաժողովներ‚ որպեսզի յուրաքանչյուր հարց մանրակրկիտ քննարկվի‚ աշխատեն այնպես անել‚ որ տարբեր ոլորտային ռազմավարությունները լինեն համադրելի ու համահունչ։
