Վարչապետ Նիկոլ Փաշինյանը ներկա է եղել Դիլիջանի վերակառուցված և վերազինված բժշկական կենտրոնի բացման արարողությանը: Կառավարության ղեկավարը շրջայց է կատարել բժշկական կենտրոնով՝ ծանոթանալով իրականացված աշխատանքներին, ստեղծված պայմաններին:
Տավուշի մարզի առողջապահության զարգացման ծրագրի շրջանակում կենտրոնը սերտորեն համագործակցում է Երևանի առաջատար բժշկական կենտրոնների հետ և ընդգրկված է Հայաստանի առողջապահության ոլորտի կազմակերպություններում պետության կողմից երաշխավորված առողջապահական պետական նպատակային ծրագրերում:
2019 թվականին պետության կողմից երաշխավորված անվճար և արտոնյալ պայմաններով բժշկական օգնության ծրագրի՝ պետպատվերի շրջանակում Դիլիջանի բժշկական կենտրոնին հատկացվել է 275 մլն դրամ: Բժշկական կենտրոնն ունի նաև առողջության առաջնային պահպանման օղակ՝ պոլիկլինիկա, ծննդատուն, շտապօգնության ծառայություն:
Դիլիջանի բժշկական կենտրոնն սպասարկում է Դիլիջանի և հարակից 6 համայնքների շուրջ 20-25 հազար բնակչի: Բուժհաստատությունն ունի 175 աշխատակից, որից 30-ը՝ բժիշկ, անհրաժեշտության դեպքում պարբերաբար իրականացվում են Երևանից ևս 35 բժշկի պարբերական այցելություններ: Ներդրումային ծրագրի շրջանակում բժշկական հաստատությունն ամբողջովին հիմնանորոգվել է և համալրվել է ժամանակակից սարքավորումներով, ինչը կնպաստի բնակչությանն ախտորոշիչ, լաբորատոր, էնդոսկոպիկ, վիրաբուժական, մանկաբարձա-գինեկոլոգիական, թերապևտիկ, ամբուլատոր և ստացիոնար ծառայությունների մատուցման որակի բարձրացմանը:
