Ազգային ժողովում «Լուսավոր Հայաստան» խմբակցության առաջարկը չընդունվեց 17 կողմ, 67 դեմ և 1 ձեռնպահ ձայների հարաբերակցությամբ: Ազգային ժողովի մեծամասնությունը դեմ քվեարկեց շրջակա միջավայրի նախարար Էրիկ Գրիգորյանի հետագա պաշտոնավարման հարցը վարչապետի քննարկմանն առաջարկելու մասին որոշման նախագծին:
«Մենք ողջունում ենք հարցապնդումների ինստիտուտը կիրառելու նախաձեռնությունը, «Իմ քայլը» խմբակցությունը ակտիվորեն մասնակցել է և եկել է այն եզրակացության, որ պարոն Գրիգորյանի հրաժարականը պահանջելու հիմք չկա, ուստի մենք քվեարկելու ենք դեմ»,- ասաց խմբակցության ղեկավար Լիլիթ Մակունցը:
«Բարգավաճ Հայաստան» խմբակցությունը նշեց, որ չի մասնակցելու քվեարկությանը:
Հիշեցնենք, որ երեկվա նիստում Մանե Թանդիլյանը ներկայացրեց իրենց դժգոհությունը՝ շրջակա միջավայրի ոլորտում իրականացվող աշխատանքների հետ կապված:
«Էկոլոգիական անվտանգությունը մարդու կենսական, կարևոր էկոլոգիական շահերի պաշտպանվածության վիճակն է, ամենից առաջ նրա իրավունքը՝ ունենալու կյանքի համար մաքուր, առողջ, բարենպաստ շրջակա բնական միջավայր: Կառավարության ծրագրում նշված ուղղություններից ոչ միայն ոչ մեկը չի արվում, այլև կարելի է ասել, հաճախ արվում է ուղիղ հակառակը: Ասում եք՝ Կառավարության քաղաքականությունը հանքարդյունաբերության ոլորտում ուղղված է թափանցիկության, հանրության առջև բարձր հաշվետվողականության ապահովմանը, սակայն այդպես էլ անկատար մնաց իրական շահառուների բացահայտման գործընթացը: Ձեր ամբողջ պատասխանի մեջ տպավորություն է, որ կառավարությունը չի պատկերացնում բնապահպանական խնդիրները և դրանք փոխարինում է տնտեսական խնդիրներով»,- ասել էր Մանե Թանդիլյանը:
