ՀՀ աշխատանքի և սոցիալական հարցերի նախարարության Զբաղվածության պետական գործակալությունն աշխատանքի տոնավաճառ է կազմակերպել Կոտայքի մարզի Եղվարդ քաղաքում: Տոնավաճառին, նախնական տվյալներով, մասնակցել է տնտեսության տարբեր ոլորտները ներկայացնող 27 գործատու, որոնց կողմից ներկայացվել է շուրջ 300 թափուր աշխատատեղ՝ 280-ը առկա, 20-ը՝ ակնկալվող:
Միջոցառման ընթացքում ինչպես աշխատանք փնտրողները, այնպես էլ գործատուները հնարավորություն են ունեցել ծանոթանալու Կոտայքի մարզի, մասնավորապես՝ Եղվարդ քաղաքի աշխատաշուկայի իրավիճակին, զբաղվածության աջակցության պետական ծրագրերին, որոնք ուղղված են աշխատանք և աշխատող գտնելու հնարավորությունների մեծացմանը:
Նշենք, որ 2019 թ. նոյեմբերի 1-ի դրությամբ աշխատանք փնտրողների թիվը Կոտայքի մարզում կազմում է 9.0 հազար մարդ, որը նախորդ տարվա նույն ժամանակահատվածի համեմատ նվազել է 5.6 %-ով:
Գործազուրկների թիվը աշխատանք փնտրողների 67.3 %-ն է կամ 6.1 հազար մարդ: Այս ցուցանիշը նախորդ տարվա նույն ժամանակահատվածի նկատմամբ նվազել է 15.9 %-ով: Գործազուրկ կանանց թիվը գործազուրկների թվի 67.3 %-ն է կամ 4.1 հազ. մարդ: Գործազուրկի կարգավիճակ ունեցողների 23.0 %-ը երիտասարդ է, 2.8 %-ը՝ հաշմանդամություն ունեցող անձ, իսկ 35.6 %-ը՝ գյուղաբնակ:
Եղվարդ քաղաքում 2019 թ. նոյեմբերի 1-ի դրությամբ աշխատանք է փնտրում 2369 մարդ, գործազուրկ է 1388-ը: Եղվարդի աշխատաշուկայում հատկապես մեծ է առողջապահության ոլորտի մասնագետների, դասավանդողների, ֆինանսների և առևտրի բնագավառի աշխատողների, հաճախորդների իրազեկմամբ զբաղված ծառայողների, հանրային սննդի կազմակերպությունների աշխատողների, սննդի վաճառողների և մանածագործական արդյունաբերության բանվորների պահանջարկը:
Եղվարդի զբաղվածության տարածքային կենտրոնի կողմից տարեսկզբից աշխատանքի է տեղավորվել 75 մարդ:
