Հայաստանի Հանրապետության բռնցքամարտի ֆեդերացիան 2019 թվականի օգոստոսի 15-ին բողոք է ներկայացրել Հայաստանի ազգային օլիմպիական կոմիտեի դեմ՝ ՀԱՕԿ-ի ասամբլեայի կողմից կայացված որոշման առիթով (ՀԲՖ-ին ՀԱՕԿ-ի անդամակցությունից զրկելը): Այդ առթիվ Լոզանի սպորտային արբիտրաժային դատարանը (CAS) գործ է հարուցել օգոստոսի 21-ին:
ՀԱՕԿ լրատվական ծառայության փոխանցմամբ՝ 2019 թվականի սեպտեմբերի 26-ին CAS-ը տեղեկացրել է հայցվորին (ՀԲՖ), որ դեռևս չի ստացել բողոքարկման ամփոփագիրը և, ըստ այդմ, հորդորել է մինչև հոկտեմբերի 3-ը, որպես ապացույց, ներկայացնել բողոքարկման համառոտագիրը։
Քանի որ հայցվորի բողոքարկման համառոտագրի ներկայացնելու ժամկետը լրացել է հոկտեմբերի 3-ին, դատարանը բողոքարկումը չեղյալ է համարել` հաշվի առնելով, որ բողոքարկման ոչ մի գրություն չի ներկայացվել, պատասխաններ չեն ներկայացվել և հանձնաժողով չի ստեղծվել:
CAS-ը հայտարարում է, որ Հայաստանի Հանրապետության բռնցքամարտի ֆեդերացիա - Հայաստանի ազգային օլիմպիական կոմիտե դատական գործընթացը դադարեցվել է բավարար հիմքեր չունենալու պատճառով:
