Այս գիշեր Իրաքի հարավային երկու քաղաքներում տեղի ունեցած բողոքի ցույցերի ժամանակ մահացել է 11 մարդ, այդ թվում՝ մեկ ոստիկան: Այսպիսով, հակակառավարական զանգվածային ակցիայի զոհ է դարձել 18 մարդ: Երկրում լարվածության սրման պատճառով Իրաքի հարավային բնակավայրերում և մայրաքաղաքում պարետային ժամ է սահմանվել, ամբողջ երկրում անջատվել է համացանցային կապը: Չնայած որոշ սահմանափակումներին՝ տարբեր շրջաններում բողոքի ակցիաները շարունակվում են: Օրինազանցներին ցրելու և կարգուկանոն հաստատելու համար իրավապահ մարմիններն արցունքաբեր գազ, ջրաշիթ ու հրազեն են օգտագործել: Փողոց դուրս եկած քաղաքացիները բողոքում են համատարած գործազրկության, կոռուպցիայի ու հանրային ծառայությունների վատ որակի դեմ:
