Քարդաշյանների աստղային ընտանիքի այցի շնորհիվ բազմաթիվ մարդկանց համար ճանաչելի դարձավ փոքր, սակայն գողտրիկ Հայաստանը, որը շատ բան ունի առաջարկելու զբոսաշրջիկներին:
Ռեալիթի շոուների հայազգի աստղ Քիմ Քարդաշյանի ու նրա ընտանիքի այցը պատմական հայրենիք մեծ իրարանցում է առաջացրել ոչ միայն Հայաստանում, այլեւ` Արեւմուտքում: Գրեթե բոլոր հանրահայտ արեւմտյան ԶԼՄ-ներն անդրադարձել են «դարակազմիկ» այցին:
Բրիտանական The Daily Mail պարբերականը հրապարակել է «Հայաստա՜ն, մենք գալիս ենք. Քիմ Քարդաշյանը վերադառնում է իր արմատներին» խորագրով նյութ։ Այնտեղ ներկայացված է Քարդաշյանի, Քանյե Ուեսթի ու դստեր` Լոս Անջելեսի օդանավակայանում արված ֆոտոշարքը: Հեռուստաստղն իր ընտանիքի հետ պատրաստվում էր Հայաստան թռիչքին:
Քարդաշյանների ընտանիքի՝ Հայաստան գալու նպատակն է մասնակցել Օսմանյան կայսրությունում էթնիկ հայերի նկատմամբ իրականացված զանգվածային կոտորածի 100-րդ տարելիցին նվիրված միջոցառումներին: «Ութօրյա այցի ընթացքում նրանց ամենուր կհետեւեն տեսախցիկները, եւ տեսանկարահանված նյութը կհեռարձակվի «Քարդաշյանների հետ» իրապատում շոուի հետագա սերիաներում», - նշում է dailymail.co.uk-ը: Աղբյուրը հիշեցնում է, որ Քիմի հայրը` Ռոբերտ Քարդաշյանը, ծագումով հայ է, ուստի այս այցը դեպի Երեւան կարելի է համարել անչափ կարեւոր ուխտագնացություն:
The Daily Mail բրիտանական պարբերականը նաեւ գրում է, որ 34-ամյա աստղի համար «Զվարթնոց» օդանավակայանում իսկական թագավորական ընդունելություն է կազմակերպվել: Աղբյուրը հիշատակել է նաեւ ավանդական հայկական տարազներ հագած աղջիկներին, ովքեր աղուհացով են դիմավորել աշխարհահռչակ հայրենակիցներին:
Քարդաշյանների այցին են անդրադարձել նաեւ այլ միջազգային հեղինակավոր այլ պարբերականներ։ Մասնավորապես, The USA Today-ը գրում է, որ Քարդաշյանների այցը Հայաստան իսկական քաոս է առաջացրել մայրաքաղաք Երեւանում: Այցի դրդապատճառների մասին խոսելիս` ամերիկյան աղբյուրը նշում է, որ հայկական արմատներով ընտանիքը ցանկանում է վերադառնալ իր արմատներին, ինչպես նաեւ հարգել Հայոց ցեղասպանության 100-րդ տարելիցը:
Hello ամսագիրը գրում է, որ Քարդաշյանների աստղային ընտանիքի այցի շնորհիվ բազմաթիվ մարդկանց համար ճանաչելի դարձավ փոքր, սակայն գողտրիկ Հայաստանը, որը շատ բան ունի առաջարկելու զբոսաշրջիկներին:
Իրենց այցին սոցցանցերում արձագանքել են նաեւ «երեկոյի աստղերը»։ Քարդաշյան քույրերին առանձնապես տպավորել է իրենց դիմավորելու համար հավաքված մարդկանց աննկարագրելի մեծ բազմությունը: Մասնավորապես՝ Քլոյե Քարդաշյանն Ինստագրամի իր էջում գրել է. «Հայաստանում մեր նկատմամբ ցուցաբերված սիրառատ ու ջերմ ընդունելությունն անչափ գեղեցիկ էր, բխում էր մաքուր սրտից: Այժմ ուզում եմ մի քիչ քնել եւ օր ցերեկով տեսնել Հայաստանը: Ես այնքան հուզված եմ»:
Ինքը՝ Քիմը, նույնպես Ինստագրամում գրություն էր թողել, որտեղ ասվում է. «Հայաստա՛ն, մենք վերջապես եկանք: Այնքան ուրախ եմ այստեղ լինելու ու կյանքիս գլխավոր ճամփորդություններից մեկը սկսելու համար: Չեմ համբերում՝ երբ եմ մոտիկից ծանոթանալու այս երկրին ու համեղ բաներ ուտելու»: Հեռուստաաստղը նաեւ հավելել է, որ իր հայրը, ինչպես նաեւ տատն ու պապն անչափ կհպարտանային` տեսնելով այս ամենը:
Մանրամասները` տեսանյութում
