ER İqtisadiyyat naziri Gevorq Papoyan Birləşmiş Ərəb Əmirliklərinin Ras Əl-Xaymə şəhərində keçirilən Made by Armenians 2025 sərgisində iştirak edib. Bu barədə Ermənistan Respublikasının İqtisadiyyat Nazirliyi məlumat yayıb.
Tədbirdə Ras Əl-Xaymənin vəliəhdi Şeyx Məhəmməd bin Səud bin Saqr Əl Qasimi, Ras Əl-Xaymə Ticarət Palatasının prezidenti Məhəmməd Əl-Nuaimi, Ermənistan Respublikasının BƏƏ-dəki səfiri Karen Qriqoryan, habelə Ermənistandan və BƏƏ-dən iş adamları, sərmayədarlar, digər dövlət rəsmiləri iştirak ediblər.
Açılış mərasimində nazir qeyd edib:
“Ermənistan və BƏƏ dinamik inkişaf edən iqtisadi tərəfdaşlığı bölüşür. 2024-cü ildə ticarət dövriyyəmiz əvvəlki illə müqayisədə iki dəfə artaraq 5,7 milyard dolları ötüb. BƏƏ-yə Ermənistan mallarının ixracı xeyli genişlənib ki, bu da artan tələbatın və işgüzar əlaqələrimizin möhkəmlənməsinin sübutudur. Bu cür tədbirlər iqtisadi əməkdaşlığın dərinləşdirilməsi, investisiyaların təşviqi və ticarət imkanlarının genişləndirilməsi ilə bağlı ümumi baxışımızı əks etdirir”.
Sərgi çərçivəsində işgüzar görüşlər və mədəni tədbirlərin keçirilməsi planlaşdırılır. Sərgi fevralın 22-dək açıq olacaq.
