Yanvarın 21-də Ermənistan Respublikasının İnsan Hüquqları Müdafiəçisi Anahit Manasyan Avropa Şurasının İnsan Hüquqları və Qanunun Aliliyi Baş Direktorluğunun Transversal Çağırışlar və Çoxtərəfli Proqramların İcrası Departamentinin rəhbəri Tiqran Karapetyanı qəbul edib. Bu barədə Ombudsman Aparatından məlumat verilib.
Qonağı salamlayan Anahit Manasyan İnsan Hüquqları Müdafiəçisi Ofisinin Avropa Şurası ilə sabit və konstruktiv əməkdaşlığını vurğulayıb, Ermənistanda insan hüquqlarının müdafiəsi sisteminin inkişafında Avropa Şurası ilə həyata keçirilən layihələrin rolunu qeyd edib.
Bu kontekstdə “Ermənistan Silahlı Qüvvələrində insan hüquqlarının təşviqi” proqramı çərçivəsində həyata keçirilən tədbirlərə istinad edilib.
Hərbi təhsil müəssisələrində insan hüquqlarının tədrisinin təkmilləşdirilməsi və inkişaf etdirilməsi zərurəti məsələləri də müzakirə edilib, yeni proqram istiqamətləri müəyyən edilib.
