Fransa prezidenti Gürcüstan xalqına müraciət edib, Emmanuel Makron vətəndaşların Avropa istəklərini dəstəklədiyini bildirib.
"Bu arzu bu gün Tbilisidə və Gürcüstanın onlarla yaşayış məntəqəsində sülh yolu ilə ifadə olunur", - prezident bildirib. O, Gürcüstan hökumətini gecikmədən Avropa İttifaqı ilə işləməyə və Respublikanın Avropa gələcəyini qurmağa çağırıb.
"Aİ məcbur etmir, Avropa bərabərhüquqlu tərəfdaşlığa və firavanlığa yol açmağı təklif edir. Avropa qorxutmur, təhdid etmir, müharibəyə təhrik etmir", - Makron bildirib.
O, həmçinin aksiyalar zamanı dinc nümayişçilərə qarşı zorakılığı, insanların fundamental azadlıqlarının pozulmasını pisləyib.
Bundan əvvəl Gürcüstanın baş naziri Avropa İttifaqını Tbilisiyə qarşı hədələyici ifadələr işlətməkdə və Avropaya inteqrasiyadan şantaj vasitəsi kimi istifadə etməkdə ittiham etmişdi.
