Tesla, SpaceX, OpenAI şirkətlərinin həmtəsisçisi İlon Mask Yerevanda keçirilən Ümumdünya İnnovasiya və Texnologiya Konqresinin (WCIT2024) iştirakçılarına xüsusi mesaj göndərib. Armenpress-in məlumatına görə, bu mesajı Silikon Vadisi sahibkarı, Viki, Pixel Labs, eləcə də dünya şöhrətli futbolçu Lionel Messiyə məxsus investisiya şirkəti Play Time Ventures-in icraçı direktoru, Silikon Vadisi sahibkarı Razmiq Hovagimyan səsləndirib.
“Hamını salamlayıram. Təəssüf edirəm ki, bu dəfə Yerevanda ola bilmədim, amma ümid edirəm ki, növbəti dəfə şəxsən orada olacağam. Mən Starlink-i Ermənistana gətirmək və yerli texnoloji ictimaiyyətlə kosmosun tədqiqindən tutmuş açıq və şəffaf Süni İntellektin inkişafına qədər böyük layihələr həyata keçirmək ideyasından həyəcanlanıram ki, bu da insan idrakının sərhədlərini daha da genişləndirəcək”, - deyə İlon Maskın mesajında qeyd edilib.
Ermənistan ikinci dəfə WCIT-ə ev sahibliyi etdi, birincisi 2019-cu ildə keçirilib. WCIT2024 oktyabrın 4-7-də Karen Dəmirçyan adına İdman Konsert Kompleksində keçirilib.
