ABŞ Müdafiə Departamentinin ("Pentaqon") rəhbəri Lloyd Ostin israilli həmkarı Yoav Qallanta zəng vurub.
O bu barədə özünün "X" hesabında yazıb. "Həmrəyik ki, İsrailin şimal sərhədi boyunca hücum infrastrukturu dağıdılmalıdır", - "Pentaqon" rəhbəri bildirib.
O həmçinin mülki şəxslərin sərhədin hər iki tərəfindəki evlərinə təhlükəsiz qayıtmaları məqsədilə diplomatik qətnamənin də vacibliyini diqqətə çatdırıb. Digər tərəfdən, "Hizbullah"ı dəstəkləyən İranın İsrailə doğru mümkün hücumuna da toxunaraq, Vaşinqtonun belə hücuma cavabsız qalmayacağına eyham vurub.
"ABŞ İranın və onun himayəsindəki terror təşkilatlarının təhdidləri qarşısında öz şəxsi heyətini və müttəfiqlərini qorumağa hazırdır. İranın İsrailə birbaşa hərbi hücuma keçəcəyi təqdirdə, ağır nəticələrlə üzləşəcək", - Ostin yazıb.
