Mayın 20-də Ermənistan Parlamentinin sədr müavini, Ermənistan-Gürcüstan dostluq qrupunun rəhbəri Ruben Rubinyan Gürcüstan parlamentinin Mədəniyyət komitəsinin sədri Eliso Bolkvadzenin başçılıq etdiyi nümayəndə heyətini qəbul edib. Bu barədə ER Parlamenti məlumat yayıb.
İclasda Parlamentin Elm, təhsil, mədəniyyət, diaspor, gənclər və idman daimi komissiyasının sədri Sisak Gabrielyan iştirak edib.
Ruben Rubinyan qonaqları salamlayaraq vurğulayıb ki, parlamentarilərin son vaxtlar aktiv qarşılıqlı səfərləri Ermənistan-Gürcüstan münasibətlərinin bütün səviyyələrdə daha da fəallaşdığını göstərir. Parlamentin sədrinin müavini mədəni əməkdaşlığın yeni mərhələyə çıxarılmasının zəruriliyindən danışıb.
Eliso Bolkvadze qeyd edib ki, Gürcüstan parlamentində rəhbərlik etdiyi komitə yeni yaradılıb və əlaqələrin inkişafına yönəlmiş ilk memorandum Ermənistan Parlamentinin elm, təhsil, mədəniyyət, diaspor, gənclər və idman daimi komissiyası ilə imzalanıb.
Görüşdə regional məsələlər də müzakirə olunub. Tərəflər Cənubi Qafqazda uzunmüddətli sülhün bərqərar olmasını vurğulayıblar.
