Xarici işlər naziri Ararat Mirzoyan Avropa Parlamentinin “Avropa İttifaqı ilə Ermənistan arasında daha sıx əlaqələr və Azərbaycanla Ermənistan arasında sülh sazişinin bağlanmasının zəruriliyi haqqında” qətnamənin qəbul edilməsini alqışlayıb.
“Avropa Parlamentinin qətnaməsinin belə böyük səs çoxluğu ilə qəbul edilməsini və Ermənistanla Avropa arasında daha sıx əlaqələrin, Ermənistan və Azərbaycan arasında sülh müqaviləsinin bağlanmasının zəruriliyi barədə aydın mesajları alqışlayaraq, biz demokratiyaya güclü sadiqliklə, regionda davamlı sülhün inkişafı və qurulması ilə tərəfdaşlığımızı daha da dərinləşdirməyi səbirsizliklə gözləyirik” – nazir özünün X mikrobloqunda bildirib.
