İran Xarici İşlər Nazirliyinin sözçüsü Nasir Kənani mətbuat konfransında İran və Azərbaycan münasibətlərindəki son hadisələrə və iki ölkənin xarici işlər nazirləri arasındakı təmaslara toxunub. O qeyd edib:
“İki ölkənin xarici işlər nazirləri arasında müxtəlif tezliklərdə dörd fərqli müzakirə aparılıb. Onların son mərhələsində gərginliyi idarə etmək və anlaşılmazlıqları aradan qaldırmaq üçün iki ölkə arasında texniki nümayəndə heyətlərinin mübadiləsi də daxil olmaqla bəzi praktiki addımlar barədə razılıq əldə olunub.
Razılıq çərçivəsində iki ölkə arasında nümayəndə heyətləri mübadiləsi aparılıb”.
Onun sözlərincə, indi ikitərəfli gərginliyin yumşaldılması problemi müzakirə olunur ki, bunun ardınca Tehranda Azərbaycan səfirliyinin yenidən açılması məsələsi gələcək.
