Ermənistanın xarici işlər naziri Ararat Mirzoyan bu gün Cenevrədə İranın xarici işlər naziri Hüseyn Əmir Abdullahyanla görüşüb.
Ermənistan və İranın xarici işlər nazirləri ikitərəfli formatda, eləcə də çoxtərəfli platformalarda əməkdaşlıqla bağlı məsələləri müzakirə ediblər. Ermənistan və İran arasında siyasi dialoqun yüksək səviyyədə olması hər iki tərəfdən məmnunluq hissi ilə qeyd olunub.
Birgə səylərin qarşılıqlı maraq doğuran sahələrdə, o cümlədən enerji, nəqliyyat və infrastruktur sahələrində əməkdaşlığın daha da inkişafına töhfəsi xüsusi vurğulanıb.
Görüşdə regionda təhlükəsizlik və sabitlik məsələləri ətrafında fikir mübadiləsi aparılıb.
Ararat Mirzoyan Laçın dəhlizinin bağlanması nəticəsində yaranmış çətin humanitar vəziyyətə toxunaraq, 2020-ci il 9 noyabr tarixli bəyanatın müddəalarına uyğun olaraq Azərbaycanın Dağlıq Qarabağın blokadasına ilkin şərt olmadan dərhal son qoymasının vacibliyini vurğulayıb.
Bu kontekstdə fevralın 22-də Beynəlxalq Ədalət Məhkəməsinin Azərbaycana qarşı fövqəladə tədbirlərin tətbiqi ilə bağlı çıxardığı qərarın icrası da vurğulanıb.
Nazir Mirzoyan Ermənistan-Azərbaycan münasibətlərinin tənzimlənməsi prosesi ilə bağlı son hadisələri də təqdim edib.
