“Kollektiv Təhlükəsizlik Müqaviləsi Təşkilatı (KTMT) Ermənistana müşahidəçilər göndərməyə hazırdır, bunun üçün Kollektiv Təhlükəsizlik Şurasının qərar verməsi lazımdır”.
Bunu Rusiyanın xarici işlər naziri Sergey Lavrov deyib.
“Ermənistan KTMT-nin növbədənkənar sammitini çağırmağı xahiş etdikdən dərhal sonra bu zirvə baş tutub və KTMT-nin baş katibinin, Birləşmiş Qərargah rəisinin Ermənistana göndərilməsi barədə qərar qəbul edilib. Onlar Ermənistana səfər etdilər və Ermənistanın tövsiyələrini təşkilata çatdırdılar. Bu tövsiyələr bir aydan çoxdur ki, bizdədir. Bu tövsiyələr Ermənistan ərazisinə, Azərbaycanla sərhədə KTMT müşahidəçilərinin monitorinq missiyasının göndərilməsindən ibarətdir”, - Sergey Lavrov bildirib.
O vurğulayıb ki, tələb olunan yeganə məsələ KTMT sədri tərəfindən çağırılmalı olan Kollektiv Təhlükəsizlik Şurasının qərar verməsidir.
Lavrov Mirzoyanla danışıqlarda Avropa liderlərinin son təmasları nəzərə alınmaqla, Ermənistanla Azərbaycan arasında münasibətlərə nəzər yetirməyi təklif edib.
