ER Baş naziri Nikol Paşinyan Almaniya Federativ Respublikası Bundestaqının vitse-prezidenti Katrin Herinq-Ekhardtı və onun başçılıq etdiyi nümayəndə heyətini qəbul edib.
Nikol Paşinyan son dövrdə dinamik şəkildə inkişaf edən ikitərəfli münasibətlərin əhəmiyyətini vurğulayıb və qeyd edib ki, Ermənistan-Almaniya əməkdaşlığı siyasi və iqtisadi maraqlara əsaslanır.
Paşinyan bildirib ki, Almaniya Aİ ölkələri arasında Ermənistanın ən böyük ticarət və iqtisadi tərəfdaşıdır və Ermənistan birgə iqtisadi layihələrə və Ermənistanın demokratiya gündəminə Almaniyanın dəstəyinə əhəmiyyət verir.
Katrin Herinq-Ekhardt öz növbəsində qeyd edib ki, Almaniya Ermənistanla siyasi dialoqun gücləndirilməsində və müxtəlif iqtisadi sahələrdə layihələrin reallaşdırılmasında maraqlıdır.
Həmsöhbətlər Cənubi Qafqaz regionundakı vəziyyət və təhlükəsizlik çağırışları barədə də fikir mübadiləsi aparıblar. Bundestaqın vitse-prezidenti qeyd edib ki, Almaniya regional sülhə dəyər verir və Ermənistanın bu istiqamətdə atdığı addımları dəstəkləyir. Tərəflər xristian mədəni irsinin qorunub saxlanması üçün birgə səylərin vacibliyini vurğulayıblar.
