Birləşmiş Ştatlar Ermənistan və Azərbaycan arasında həmfikir tərəfdaşlarla, o cümlədən ATƏT-in Minsk qrupunun həmsədri kimi bu ölkələrə hərtərəfli sülhə nail olmaqda kömək etmək üçün ikitərəfli sülh danışıqlarında iştirak etməyə hazırdır.
Bu barədə “Armenpress”ə ABŞ-ın Ermənistandakı səfirliyindən Rusiyanın xarici işlər naziri Sergey Lavrovun ATƏT-in Minsk qrupunun həmsədrləri ilə bağlı son bəyanatına cavab olaraq bildiriblər.
“Biz Baş nazir Paşinyanın aprelin 6-da Brüsseldə prezident İlham Əliyev ilə görüşünü, o cümlədən sülh danışıqlarının hazırlanması və sərhədlərin delimitasiyası üzrə ikitərəfli komissiyanın formalaşdırılmasının müsbət addımını alqışladıq.
Birləşmiş Ştatlar Cənubi Qafqazda dinc, demokratik və firavan gələcək qurmaqda maraqlıdır”.
Qeyd olunub ki, Dövlət katibinin aprelin 5-də iki ölkənin liderləri ilə telefon danışıqları zamanı qeyd etdiyi kimi, ABŞ Ermənistan və Azərbaycan arasında sülh danışıqlarının davam etdirilməsini təşviq etməkdə davam edir.
