Dekabrın 22-də ER Təhlükəsizlik Şurasının katibi Armen Grigoryan Ermənistanda işgüzar səfərdə olan Kollektiv Təhlükəsizlik Müqaviləsi Təşkilatının baş katibi Stanislav Zas ilə görüşüb.
Görüş zamanı tərəflər Ermənistanın KTMT-yə sədrliyi dövründə həyata keçiriləcək proqramları müzakirə ediblər.
Bu kontekstdə terrorizm, ekstremizm, miqrasiya təhlükəsizliyi, bioloji təhlükəsizlik və narkotik vasitələrin qanunsuz dövriyyəsinə qarşı siyasətin hazırlanmasında KTMT-yə üzv dövlətlərin birgə fəaliyyəti prioritet hesab edilib.
Tərəflər Ermənistan-Azərbaycan, Tacikistan-Qırğızıstan və Tacikistan-Əfqanıstan sərhədlərində gərginliyin azaldılmasına töhfə verməklə bağlı fikir mübadiləsi aparıblar.
Təhlükəsizlik Şurasının katibi Armen Grigoryan Ermənistan-Azərbaycan sərhədindəki vəziyyəti təqdim edərək, bunun Ermənistan üçün birinci dərəcəli əhəmiyyət kəsb edən çağırış olduğunu vurğulayıb.
Bu kontekstdə hər iki tərəf Ermənistan-Azərbaycan sərhədinin demarkasiyası prosesinin tez başlaması üçün şəraitlərin təmin edilməsini vacib sayıb․
